فات الميعاد

من أروع الحاجات اللي ممكن تعملها في لحظات التسامح النفسي مع الذات، إنك تعمل لنفسك كباية شاي بالنعناع وتقعد "تستحيها" على أنغام أغنية "فات الميعاد" للست أم كلثوم.

رائعة الأغنية دي، وخصوصاً المقطع بتاع "تفيد بإيه يا ندم"

وتحس كده بكلمات مرسي جميل عزيز البسيطة الواقعية، اللي هي ممكن تحكيها على لسانك في حديث عادي خالص بدون غنا.

ودخول ألحان بليغ حمدي على كلمات مرسي علشان يعملوا عجينة طرية تاخدها أم كلثوم وتعمل منها حفلة غنائية رائعة، تحس فيها إن الموسيقى زي الفستان الجميل اللي لبساه عروسة شابة حسناء في ليلة عمرها، وتبتدي تتلخبط فيك المشاعر بين معنى الكلام وحلاوته وبين جمال الصوت ومعناه.

وترجع تشرب الشاي وتندم إنك ما حطيت سكر كتير، وتحس إن هيفرق كتير لو السكر كان مضبوط، وتفضل حيران: تقوم تحط سكر ولا تشرب وإنت ساكت؟ وشفطه ورا شفطه تخلص الكباية، وصوت أم كلثوم مبيخلصش.